У рамках умацавання абарончых здольнасцяў усходняга флангу НАТА Нарвегія і Аўстралія чарговы раз накіруюць у Польшчу сваю авіяцыйную падтрымку. У бліжэйшы час на тэрыторыю краіны прыбудуць самалёты пятага пакалення F-35 з Нарвегіі, а таксама самалёт далёкага радыёлакацыйнага выяўлення і кіравання AWACS з Аўстраліі.
Такое рашэнне было прынята падчас саміту НАТА ў Гаазе. Аператыўны камандуючы Узброенымі сіламі Польшчы генерал Мацей Кліш ацаніў гэтую падтрымку як значную:
— Я вельмі цешуся з навіны пра накіраванне F-35. Гэта самалёты, якія не толькі змяняюць поле бою, але і ўзровень сітуацыйнай дасведчанасці. Аўстралійскі самалёт, які ўжо падтрымліваў НАТА, цяпер будзе дзейнічаць з тэрыторыі Польшчы. Мая размова з аператыўным камандуючым УС Аўстраліі пацвердзіла: мы сутыкаемся з аднолькавымі выклікамі. Гэта сведчыць аб тым, што ўсходні фланг становіцца ўсё больш прыкметным.
Генерал Кліш таксама вітаў рашэнне ўрада Германіі працягнуць місію Бундэсвера ў Польшчы. Нямецкія зенітна-ракетныя комплексы Patriot упершыню з’явіліся ў Польшчы на пачатку 2023 года.
Каля 320 нямецкіх жаўнераў абслугоўвалі тры батарэі Patriot каля Замосця, побач з украінскай мяжой. Гэта была рэакцыя на інцыдэнт у лістападзе 2022 года, калі ўкраінская супрацьпаветраная ракета ўпала з польскага боку мяжы, тады загінулі дзве асобы.